Carolyn Cooper | Fi wi artist dem a lose out

CHAKA-CHAKA SPELLING

Sunday gone, di International Reggae Poster Contest gi out di name dem a di top 100 winner fi 2022. One whole heap a artist did send een poster fi di competition: 653 a dem. Some a dem send more than one poster. A 1,180 poster inna di contest. An di artist dem come from 53 country. Di judge dem a from all over di world same way: America, Bolivia, Bosnia, China, Cyprus, Denmark, Ecuador, Greece, Iran, Jamaica, Korea, Mexico, Paraguay, Poland, Romania, Switzerland, Turkey, United Arab Emirates an Zimbabwe.

Pon Monday, Jamaica Observer put out one story bout di contest wid dis ya headline: “No Jamaican in top 100.” Di second part a di headline a “Greek wins International Reggae Poster Contest.” It look like seh Observer nuh understand seh di contest international fi true. Dem nah ‘observe’ to dat. Di reporter mussi tink seh becau di contest name reggae, Jamaica must an bound fi big inna it.

Yu afi in it, fi win it. Nuff Jamaican artist nuh bodder wid di contest. So a how dem a go win? A ongle three out a di 653 artist a Jamaican. Nuff more artist from odder country inna di contest. Top a top, a 295 artist from China! From Mexico a 65; from Turkey a 49; from Iran a 35; from Indonesia a 14. All Russian artist did inna di contest: 14 a dem. Di chrii Jamaican artist dem did have nuff-nuff competition.

WORLD-CLASS REGGAE MUSEUM

Michael ‘Freestylee’ Thompson, one big-time graphic artist from Jamaica, a im did start di contest wid Maria Papaefstathiou, one next big-time graphic artist from Greece. Michael did know seh di contest would a show di power a reggae all over di world. An im did want di contest fi build up consciousness bout im vision fi one world-class reggae museum an concert hall inna Kingston. Michael never live fi see im dream come true. Im dead inna 2016.

Maria just a gwaan same way wid di vision an di contest. She put her whole heart inna it. So yu can imagine how she disappoint fi see seh Jamaican artist nuh business wid di contest to dat. She tell mi seh, she tink seh a becau nuh money nuh inna it. Some a di Jamaican artist dem nuh understand seh a same so nuff a di poster contest dem set. An money come odder way. Chronixx pick Andrew Cachia from Malta fi design di cover a fi im album, Dread & Terrible, weh im put out inna 2014. Im did love Cachia poster weh did come second inna di 2013 contest. Fi di lickin a di spoon, nuff Jamaican artist a go lose di spoonful.

PRAPA-PRAPA SPELIN

Sonde gaan, di Intanashinal Rege Puosta Kantes gi out di niem dem a di tap 100 wina fi 2022. Wan uol iip a aatis did sen iin puosta fi di kompitishan: 653 a dem. Som a dem sen muor dan wan puosta. A 1,180 puosta ina di kantes. An di aatis dem kom fram 53 konchri. Di joj dem a fram aal uova di worl siem wie: Amerika, Boliviya, Bosniya, Chaina, Denmaak, Ekwaduor, Griis, Iran, Jamieka, Koriiya, Meksiko, Paragwai, Puolan, Romienya, Saipros, Switzalan, Torki, Yuunaitid Arab Emirets an Zimbabwe.

Pan Monde, Jamaica Observer put out wan stuori bout di kantes wid dis ya edlain: “No Jamaican in top 100.” Di sekan paat a di edlain a “Greek wins International Reggae Poster Contest.” It luk laik se Observer no andastan se di kantes intanashinal fi chruu. Dem naa ‘obsorv’ tu dat. Di ripuota mosi tink se bikaa di kantes niem rege, Jamieka mos an boun fi big ina it.

Yu afi in it, fi win it. Nof Jamiekan aatis no bada wid di kantes. So a ou dem a go win? A ongl chrii out a di 653 aatis a Jamiekan. Nof muor aatis fram ada konchri ina di kantes. Tap a tap, a 295 aatis fram Chaina! Fram Meksiko a 65; fram Torki a 49; fram Iran a 35; fram Indoniiziya a 14. Aal Roshan aatis did ina di kantes: 14 a dem. Di chrii Jamiekan aatis dem did av nof-nof komipitishan.

WORL-KLAAS REGE MYUUZIYOM

Michael ‘Freestylee’ Thompson, wan big-taim grafik aatis fram Jamieka, a im did staat di kantes wid Maria Papaefstathiou, wan neks big-taim grafik aatis fram Griis. Michael did nuo se di kantes wuda shuo di powa a rege aal uova di worl. An im did waahn di kantes fi bil op kanshosnis bout im vijan fi wan worl-klaas rege myuuziyom an kansort aal ina Kingston. Michael neva liv fi si im jriim kom chruu. Im ded ina 2016.

Maria jos a gwaan siem wie wid di vijan an di kantes. Shi put ar uol aat ina it. So yu kyan imajin ou shi disapaint fi si se Jamiekan aatis no bizniz wid di kantes tu dat. Shi tel mi se, shi tink se a bikaa no moni no ina it. Som a di Jamiekan aatis dem no andastan se a siem so nof a di puosta kantes dem set. An moni kom ada wie. Chronixx pik Andrew Cachia fram Maalta fi dizain di kova a fi im albom, Dread & Terrible, we im put out ina 2014. Im did lov Cachia puosta we did kom sekan ina di 2013 kantes. Fi di likin a di spuun, nof Jamiekan aatis a go luuz di spuunful.

For an English translation, visit https://carolynjoycooper.wordpress.com

Carolyn Cooper, PhD, is a teacher of English language and literature and a specialist on culture and development. Email feedback to columns@gleanerjm.com and karokupa@gmail.com.