Carolyn Cooper | Wa mek man fraid fi go a doctor?

CHAKA-CHAKA SPELLING

Nuff man would a dead long time if dem never have wife. Dat a if di wife care bout dem. Becau nuff man an woman a live lakka puss an dog. Dem deh eena di same house, but dem nuh business wid one anodder. A sake a ‘might as cheap’ mek dem di deh. An a cheap fi true. If dem bruck up, dem a go a fi find two place fi live.

An a cheapness mek some man nuh waa go a doctor. Mi know seh some a di doctor dem well unconscionable. A ongle money dem a deal wid. One man tell mi seh, im nuh like how di doctor dem operate. Im go a one doctor an im pay $10,000 fi tell di doctor how im feel. Di doctor send im fi go do one test. When im fi go back fi get di test result, im a fi pay one next $10,000. Mi tink seh di doctor dem can do lickle better fi all a di people dem weh nuh have nuh insurance. But still! Yu cyaa mek cheapness stop yu from look after yuself.

One big problem weh mek nuff man nuh waa go a doctor, a nuh fi dem fault. A how dem grow. From dem a pikni, dem hear seh man nuh fi cry. Man a fi strong. Man a fi deal wid pain. So di big man dem sit down deh, wid big pain, til dem cyaa tek it nuh more. An by di time dem go a doctor, it too late. Di pain did a tell dem seh supm wrong wid dem, an dem nah listen.

NUH REGULAR TUNE-UP

A nuh ongle Jamaica man nuh waa go a doctor. Mi Google, “Why are men afraid of going to the doctor?” An nuff-nuff answer come up from all bout. Tek for instance: Times of India put out one report inna 2019, “Here is why more men avoid going to the doctor.” Dem seh, “According to the new research of 1000 men, it was found that while 80 per cent of the men remembered the model of the first car they ever bought, they could not recollect the last time they visited a doctor. This is especially scary because there are a lot of medical conditions that do not exhibit any particular symptoms and regular checkup is the only way for proper diagnosis.”

Nuff man look after dem vehicle better an how dem treat demself! Dem nah gi demself nuh regular tune-up. Dem gwaan like seh dem a old iron. An dem cyaa mash up. Wi a fi start wid di yute dem. Wi a fi mek dem know seh a nuh nuh disgrace fi admit seh yu sick. Man a fi go a doctor. Time fi man stop play tough. An save dem life!

PRAPA-PRAPA SPELIN

Nof man wuda ded lang taim if dem neva av waif. Dat a if di waif kier bout dem. Bikaa nof man an uman a liv laka pus an daag. Dem de iina di siem ous, bot dem no bizniz wid wan anada. A siek a ‘mait az chiip’ mek dem di de. An a chiip fi chruu. If dem brok op, dem a go a fi fain tuu plies fi liv.

An a chiipnis mek som man no waahn go a dakta. Mi nuo se som a di dakta dem wel ankanshanebl. A ongl moni dem a diil wid. Wan man tel mi se, im no laik ou di dakta dem apariet. Im go a wan dakta an im pie $10,000 fi tel di dakta ou im fiil. Di dakta sen im fi go du wan tes. Wen im fi go bak fi get di tes rizolt, im a fi pie wan neks $10,000. Mi tingk seh di dakta dem kyahn du likl beta fi aal a di piipl dem we no av no inshuorans. Bot stil! Yu kyaahn mek chiipnis stap yu fram luk aafta yuself.

Wan big prablem we mek nof man no waahn go a dakta, a no fi dem faalt. A ou dem gruo. Fram dem a pikni, dem ier se man no fi krai. Man a fi schrang. Man a fi diil wid pien. So di big man dem si dong de, wid big pien, til dem kyaahn tek it no muor. An bai di taim dem go a dakta, it tuu lait. Di pien did a tel dem se sopn rang wid dem, an dem naa lisn.

NO REGLA CHUUN-OP

A no ongl Jamieka man no waahn go a dakta. Mi Google, “Why are men afraid of going to the doctor?” An nof-nof ansa kom op fram aal bout. Tek far instans: Times of India put out wan ripuot ina 2019, “Here is why more men avoid going to the doctor.” Dem se, “According to the new research of 1000 men, it was found that while 80 per cent of the men remembered the model of the first car they ever bought, they could not recollect the last time they visited a doctor. This is especially scary because there are a lot of medical conditions that do not exhibit any particular symptoms and regular checkup is the only way for proper diagnosis.”

Nof man luk aafta dem viikl beta an ou dem chriit demself! Dem naa gi demself no regla chuun-op. Dem gwaan laik se dem a uol aiyan. An dem kyaahn mash op. Wi a fi staat wid di yuut dem. Wi a fi mek dem nuo se a no no disgries fi admit se yu sik. Man a fi go a dakta. Taim fi man stap plie tof. An siev dem laif!

For an English translation, visit carolynjoycooper.wordpress.com

Carolyn Cooper, PhD, is a teacher of English language and literature and a specialist on culture and development. Email feedback to columns@gleanerjm.com and karokupa@gmail.com