Jamaica man love tall-hair woman

Chaka-chaka spelling

ONE SATURDAY morning, mi a walk a Mona dam. An mi pass four woman a dead wid laugh. Mi hear like one a dem seh, 'Weh yu husband tell yu seh?' Mi had was to fast inna di argument. So mi jump een an aks, 'A wa unu a talk bout?' One a di woman seh she did want cut har hair. She mek mistake go tell har husband. Him tell har seh har face too fat an favour moon. Him seh she fi keep di length a har hair.

One a di friend seh, 'But it never have no length to dat!' An dem laugh an she seh a no even length weh coulda wear scrunchy. Anyhow, she decide har mind fi cut har hair. After all. A no fi har head? One a di friend tell har seh di short hair mek har look young. An one nodder one aks her wa di husband him seh. Him never bodder seh nutten. She no know if a beks him beks or a wa. An she no bodder aks im nutten. Wa mek im feel seh im can a tell big woman wa fi do wid fi her owna head?

Through di man dem love tall hair, dem put plenty pressure pon di woman dem wid piki-piki head. Dem ha fi a weave een odder woman hair fi please dem husband. So dem tink. Unu know di ting wa beks mi? Some a dem man ya a ring hypocrite. Dem wi have dem tall-hair wife put down a yard, under manners, a tell her seh she can't do dis an she can't do dat. She can't cut her hair. An same time dem outa road a check bald-head woman. Jackass seh di world no level. An a true.

MAN AND WOMAN STORY

One time mi go a one party an dis man a tell mi seh di first time him married fi suit him mumma. Him married one nice browning wid tall hair. An him seh di next time him a go married fi suit himself. Inna him heart a heart an odder part, im did want one black woman. Mi no know if a question im dida try put to mi. But mi couldn't answer dat deh question. Him no ready. If him coulda mek him mumma rule him, mi couldn't deh wid all laka him.

Yu see dis man an woman story. It no easy. Yu have some woman weh love blame dem husband fi dem hairstyle: "I would really like to, but I just can't locks my hair. My husband wouldn't like it". Lie. Dat a fi mek yu know seh dem got husband. An plenty time di said same husband no business wid dem. A it mek di woman dem ha fi a gwaan like seh di husband a tek interest.

Mi know seh plenty woman no have no confidence fi stand up fi demself. Dem feel seh dem must an bound fi do weh dem husband tell dem, like dem a pikni. Mi sorry fi dem. If yu a big woman, an yu can't even wear yu owna hair di way you uda like, how yu a go mek big-big decision fi yuself? A high time dem woman deh bruck outa mental slavery an start tek charge a dem life.

PRAPA-PRAPA SPELIN

Wan Satide maanin, mi a waak a Mona dam. An mi paas fuor uman a ded wid laaf. Mi ier laik wan a dem se, 'We yu ozban tel yu se?' Mi ad woz tu faas iina di aagyument. So mi jomp iin an aks, "A wa unu a taak bout?" Wan a di uman dem se shi did waahn kot ar ier. Shi mek mistiek an go tel ar ozban. Im tel ar se ar fies tuu fat an fieva muun. Im se shi fi kip di lent a ar ier.

Wan a di fren se, 'Bot it neva av no lent tu dat!' An dem laaf, an shi se a no iivn lent we kuda wier skunchi. Eni-ou, shi disaid ar main fi kot ar ier. Aaftar aal. A no fi ar ed? Wan a di fren tel ar se di shaat ier mek ar luk yong. An wan neda wan aks ar wa di ozban im se. Im neva bada se notn. Shi no nuo if a beks im beks ar a wa. Shi no bada aks im notn. Wa mek im fiil se im kyahn a tel big uman wa fi du wid fi ar uona ed?

Chruu di man dem lov taal ier, dem put plenti presha pan di uman dem wid piki-piki ed. Dem a fi a wiiv iin ada uman ier fi plliz dem ozban. So dem tingk. Unu nuo di ting wa beks mi? Som a dem man ya a ring ipokrit. Dem wi av dem taal-ier waif pudong a yaad, aanda manaz, a tel ar se shi kyaahn du dis an shi kyaahn du dat. Shi kyaahn kot ar ier. An siem taim dem outa ruod a chek baal-ed uman. Jakaas se di worl no levl. An a chruu.

MAN AN UMAN TUORI

Wan taim mi go a wan paati an dis man a tel mi se di fos taim im marid fi suut im muma. Im marid wan nais brounin wid taal ier. An im se di neks taim im a go marid fi suut imself. Ina im haat a haat an ada paat, im did waan wan blak uman. Mi no nuo if a kweschan im dida chrai put to mi. Bot mi kudn ansa dat de kweschan. Im no redi. If im kuda mek im muma ruul im, mi kudn de wid aal laka im.

Yu si dis man an uman tuori. It no iizi. Yu av som uman we lov bliem dem ozban fi dem ierstail: "I would really like to, but I just can't locks my hair. My husband wouldn't like it". Lai. Dat a fi mek yu nuo se dem gat ozban. An plenti taim di sed siem ozban no bizniz wid dem. A it mek di uman dem a fi a gwaan laik se di ozban a tek inchres.

Mi nuo se plenti uman no av no kanfidens fi stan op fi demself. Dem fiil se dem mos an boun fi du we dem ozban tel dem, laik dem a pikni. Mi sari fi dem. If yu a big uman, an yu kyaahn iivn wier yu uona ier di wie yu uda laik, ou yu a go mek big-big disizhan fi yuself? A ai taim dem uman de brok outa mental slievri an staat tek chaaj a dem laif.

Carolyn Cooper is a professor of literary and cultural studies at the University of the West Indies, Mona. Visit her bilingual blog at http://carolynjoycooper.wordpress.com/. Email feedback to columns@gleanerjm.com and karokupa@gmail.com.